သက်ကြီးရွယ်အိုစောင့်ရှောက်ရေးဂေဟာကို စစ်ဆေးရာ အိပ်ရာနှင့်ချိတ်ထားသည့် သံလှောင်အိမ်များ တွေ့ရှိ

အလုပ်သမားဟစ်တိုင်၊ အောက်တိုဘာ ၅

ထိုင်းနိုင်ငံ ကန်ချနဘူရီခရိုင်ရှိ သက်ကြီးရွယ်အိုနှင့် အကူအညီလိုအပ်သူများအား စောင့်ရှောက်ပေးနေသည့် ဂေဟာတခုကို ထိုင်းဗဟိုစုံစမ်းစစ်ဆေးရေးရဲတပ်ဖွဲ့ (CIB) က ဝင်ရောက်စစ်ဆေးရာ အဆောက်အအုံတဝိုက်တွင် လိပ်ခွေဆူးကြိုးများပါသည့် သံခြံစည်းရိုးများ ကာရံထားပြီး အခန်းအတွင်းရှိ အိပ်ရာအချို့တွင် သံလှောင်အိမ်ပုံစံ အကာအရံများ တပ်ဆင်ထားသည်ကို တွေ့ရှိခဲ့ကြောင်း ထိုင်းသတင်းများက ဖော်ပြသည်။

ယင်းဂေဟာနှင့်ပတ်သက်သည့် ဖြစ်စဉ်မှာ အမျိုးသမီးတဦးက သားနှင့်ချွေးမဖြစ်သူတို့က မိမိဆန္ဒမပါဘဲ ဂေဟာသို့ ပို့ဆောင်ခဲ့ကြောင်း အောက်တိုဘာ ၅ ရက်တွင် ထိုင်းရုပ်သံအစီအစဉ် “โหนกระแส” မှတဆင့် အကူအညီတောင်းခံခဲ့ရာမှ ထွက်ပေါ်လာခြင်းဖြစ်သည်။

အမျိုးသမီး၏ ပြောကြားချက်အရ သူမသည် ဂေဟာတွင် ၂ နှစ်ခွဲကျော် နေထိုင်ခဲ့ရပြီး ယင်းကာလအတွင်း ရိုက်နှက်ခံရခြင်း၊ ခြိမ်းခြောက်ခံရခြင်းနှင့် ဆေးဝါးများ အတင်းအကျပ်တိုက်ကျွေးခံရခြင်းတို့ ရှိခဲ့သည်ဟု ဆိုသည်။ နောက်ပိုင်းတွင် ညီမဖြစ်သူထံ တိတ်တဆိတ် ဆက်သွယ်အကူအညီတောင်းခံနိုင်ခဲ့ရာမှ ဂေဟာမှ ထွက်ခွာလာနိုင်ခဲ့ကြောင်းလည်း သူမက ပြောသည်။

ယင်းပြောဆိုချက်များ ထွက်ပေါ်လာပြီးနောက် CIB မှ တာဝန်ရှိသူများနှင့် “โหนกระแส” အစီအစဉ်အဖွဲ့တို့က ဂေဟာသို့ သွားရောက်စစ်ဆေးခဲ့ရာ နေထိုင်ရာအဆောက်အအုံတဝိုက်ကို သံတိုင်များဖြင့် ကာရံထားပြီး အပေါ်ပိုင်းတွင်  ဆူးကြိုးများ တပ်ဆင်ထားသည်ကို တွေ့ရှိခဲ့ကြောင်း Matichon သတင်းဌာနက ဖော်ပြသည်။

ဂေဟာအတွင်း၌လည်း သက်ကြီးရွယ်အိုနှင့် အကူအညီလိုအပ်သည့် လူနာအများအပြား အိပ်ရာပေါ်တွင် ရှိနေကြပြီး အချို့အိပ်ရာများတွင် သံတိုင်များဖြင့် လှောင်အိမ်ပုံစံ အကာအရံပြုလုပ်ကာ အိပ်ရာနှင့် တိုက်ရိုက်ချိတ်ဆက်တပ်ဆင်ထားသည်ကို တွေ့ရှိခဲ့ကြောင်း သတင်းတွင် ဖော်ပြထားသည်။

Sources — Matichon Online, Hone Krasae, and statements regarding field investigations by the Thai Central Investigation Bureau (CIB).