အချိန်ကုန်တာစိတ်မချစရာကြုံဖို့ပဲ

 

          တစ်စက္ကန့်ထက် တစ်စက္ကန့် တစ်မိနစ်ထက် တစ်မိနစ် ၊ တစ်နေ့ထက် တစ်နေ့ ဆိုသလို အချိန်တွေ နေ့ရက်တွေ တရွေ့ရွေ့ ကုန်ကုန်လာကြတယ် ၊ ဒီလို အချိန်တွေ ကုန်တာဟာ ••• နေ့ရက်က ကုန်တာမဟုတ်ဘူး ၊ အသက်တမ်း တစ်ရက်ထက် တစ်ရက် လျော့လျော့သွားတာမို့ အသက်တမ်းကသာ ကုန်ကုန်သွားရတာပဲ ၊ ရိပ်မိကြရဲ့လား ၊ နေ့တွေ ရက်တွေက ဘယ်တော့မှ မကုန်နိုင်ပါဘူး ၊ အမှန်ကုန်ဆုံးသွားခဲ့တာ ၊ အမှန်တကယ် ပျောက်ပျက်သွားတာကတော့ ၊ အသက်တမ်းပဲ ၊ ရှင်းကြရဲ့လား ။ 

          ဒကာ ဒကာမတွေ အသက်တမ်း လျော့လျော့ သွားလေလေ ၊ နေဖို့ အချိန်က နည်းသွားလေပဲ ။ သေရဖို့ အချိန် နီးလာလေ ၊ နေဖို့အချိန်က နည်းသွားလေပဲ ။ 

ပဋိစ္စသမုပ္ပါဒ်တရားတော်ကြီး

                    

နိဒါန်း

နမော တဿ ဘဂဝတော အရဟတော သမ္မာသမ္ဗုဒ္ဓဿ။

ဗုဒ္ဓသာသနာဝင် အစစ်

ပဋိစ္စသမုပ္ပါဒ်တရားတော်ဟုဆိုလျှင် အခြားဘာသာ သာသနာတို့နှင့်လုံးဝ မသက်ဆိုင်ကြောင်း, ဗုဒ္ဓသာသနာတော်နှင့်သာလျှင် သက်ဆိုင်၍ ဗုဒ္ဓသာသနာတော်တွင်း တရားသာလျှင် ဖြစ်ကြောင်း, မူလပဘဝအားဖြင့် ဗုဒ္ဓမြတ်စွာဘုရား ကိုယ်တော်တိုင် ဟောတော်မူခဲ့သော တရားတော် ဖြစ်ကြောင်များ ထင်ရှားဖော်ပြလျက် ရှိပေသည်၊ ယင်း ပဋိစ္စသမုပ္ပါဒ်တရားတော်သည် ဗုဒ္ဓသာသနာတော်၌ အရေးကြီးသော အပိုင်းကဏ္ဍ တခုအဖြစ်ဖြင့် ပါဝင်လျက်ရှိပေ၏၊ အဘယ့်ကြောင့်ဆိုသော် ဝိပဿနာယောဂီပုဂ္ဂိုလ်တို့သည် ပစ္စယပရိဂ္ဂဟဉာဏ်အဆင့်သို့ ရောက်သောအခါ ယင်းပဋိစ္စသမုပ္ပါဒ် တရားကို အကျဉ်းအားဖြင့်ဖြစ်စေ, အကျယ်အားဖြင့်ဖြစ်စေ ထိုက်သည်အားလျော်စွာ မုချသိအပ်သောကြောင့်ပင် ဖြစ်ပေသည်၊ ထို့ကြောင့်ပင် ဗုဒ္ဓမြတ်စွာဘုရားသည် ဤပဋိစ္စသမုပ္ပါဒ် တရားတော်ကို အကြိမ်တရာမက များစွာပင် ဟောကြားတော်မူခဲ့ပေသည်။