မောင်သာ(ရှေးဟောင်းသုတေသန)
မြန်မာတို့၏ ၁၂ လ ရာသီပွဲတော်များတွင် တပေါင်းလ သဲပုံစေတီပွဲဟု ဖော်ပြထားသည့်အတိုင်း တပေါင်းလတွင် ဗုဒ္ဓဘုရားရှင်ကို ရည်မှန်းလျက် သဲများဖြင့် စေတီတည်ကာ ပူဇော်သည့်ထုံးတမ်းသည် အလွန်ထင်ရှားခဲ့သည်။ ယခုအချိန်တွင် သဲပုံစေတီပွဲကျင်းပသည့် မြန်မာ့ယဉ်ကျေးမှုဓလေ့သည် နည်းပါးခဲ့ပြီဖြစ်သည်။
သို့တိုင်အောင် ရှေးအခါက တည်ထားခဲ့သည့် သဲပုံစေတီများကို မန္တလေး မြို့နှင့် ရန်ကုန်မြို့အပါအဝင် မြန်မာနိုင်ငံ၊ နေရာဒေသအချို့၌ ယခုတိုင် ဖူးမြင် နိုင်ကြသည်။ ယင်းတို့အနက် မန္တလေးမြို့၌ သဲပုံစေတီများသည် ရွှေတချောင်း ၏အရှေ့ဘက်ခြမ်းတွင် ငါးဆူနှင့် အနောက်ဘက်ခြမ်းတွင် တစ်ဆူတည်ရှိ သည်။ ထို့အတူ ရန်ကုန်တိုင်းဒေသကြီး၊ လမ်းမတော်၊ စမ်းချောင်း၊ တွံတေး စသည့် မြို့နယ်များ၊မွန်ပြည်နယ်၊ သထုံ၊ မော်လမြိုင် စသည့် မြို့နယ်များနှင့် ကျိုက္ခမီ၊ ပဲခူးတိုင်းဒေသကြီး၊ တောင်ငူမြို့နယ်အပါအဝင် နေရာ ဒေသများစွာ ၌ သဲပုံစေတီများကို တွေ့ရှိနိုင်ကြပေသည်။
