သွေးအတွင်း အဆီတိုးလာသောဓာတ်ကို Cholesterolဟုခေါ်သည်ကို ခေတ်မီသူတိုင်းသိကြပြီးဖြစ်သည်။ Cholesterol များလာလျှင် သွေးတိုး၊နှလုံးနှင့် လေဖြတ်ရောဂါတို့ဖြစ်နိုင်သည်။ အနည်းဆုံးလူဝလာပြီး အသည်းအဆီဖုံးရောဂါ ဖြစ်လေ့ရှိသဖြင့် လူတိုင်းကြောက်ရွံ့သော ဓာတ်တိုးရောဂါဖြစ်ပြီး ဝလာသူတိုင်း ခြောက်လ တစ်ကြိမ် စစ်ဆေးကြည့်ရန် ဆရာဝန်များကလည်း ညွှန်ကြားကြသည်။
ကြက်သွန်ဖြူစားလျှင် Cholesterol ကျစေသည်ဟု လူသိများသော်လည်း နောက်ပိုင်း သုတေသနပြုချက်များ အရ မသေချာဟုဆိုသည်။ထင်ထားသလောက် မကျဟုဆိုသည်။ တိုင်းရင်းဆေးပညာဘက်မှလည်း
သုတေသနပြုသည့် ဓာတ်ခွဲခန်းများထူထောင်ပြီး ခေတ်မီသိပ္ပံနည်းကျ သုတေသနပြုလုပ်ကာ Cholesterol ကျစေသည့် အပင်များကို စမ်းသပ်ရှာဖွေလျက်ရှိသည်။
မြန်မာ့မြေပေါ်တွင် ပေါက်ရောက်သည့် လက်တစ်ကမ်းမှဆေးဘက်ဝင်အပင်များ၊ အရပ်သုံးဆေးမြီးတိုအဖြစ် ရောဂါပျောက်ကြောင်း နာမည်ကြီးသည့် ဆေးပင်များဖြစ်သည်။ ထိုထဲမှ Cholesterol ကျစေသည့် ဆေးဖက်ဝင်အပင်မှာ (ဝါးပင်) ဖြစ်သည်။ ဆေးပင်သုတေသနပြုချက်များအရ ဝါးပင်မှဝါးရွက်သည် သွေးအတွင်းရှိ Cholesterol ကိုကျစေသောHypolipidaemic Activity ပါရှိပါသည်။
ဝါးရွက် လက်တစ်ဆုပ်စာမှရရှိသော သတ္တုရည်ကော်ဖီဇွန်း နှစ်ဇွန်း ကို တစ်နေ့နှစ်ကြိမ်(သို့မဟုတ်) ဝါးရွက်ပြုတ်ရည်အကြမ်းပန်းကန် တစ်ဝက်ကို တစ်နေ့နှစ်ကြိမ်သောက်သုံးပါက Cholesterolကို သိသာစွာကျ ဆင်းစေသည်။ (ကျန်းမာရေးဝန်ကြီးဌာန တိုင်းရင်းဆေးပညာဦးစီးဌာန၊ ၂၀၁၀ ပြည့်နှစ် ဒီဇင်ဘာလထုတ် လက်တွေ့အသုံးချ ဆေးဖက်ဝင်အပင်များပေါင်းချုပ်စာအုပ်၊ စာမျက်နှာ ၆၅၀ မှ) ဝါးပင်သည် မြန်မာ့
တောတောင်များတွင် သဘာဝအလျောက်ပေါက်ရောက်သော အပင်မျိုးဖြစ်သည်။ စိုက်ပျိုးပင်အဖြစ်လည်း စိုက်ပျိုးနိုင်သည်။ သမပိုင်းဥတုတွင်ပို၍ဖြစ်ထွန်းသည်။(ငှက်ပျောကဆုန်၊ ဝါးနယုန်)ဟု ဆိုသဖြင့် မိုးတစ်ပြိုက်နှစ်ပြိုက်ရွာချသည့် နယုန်လတွင် ဝါးကိုစိုက်ပျိုးနိုင်သည်ဟု ရှေးလူကြီးများအဆိုရှိသည်။
ရုက္ခဗေဒအဆိုအရ ဝါးပင်အမျိုးပေါင်း ၂၀ဝ ကျော်မျှရှိသည်။ အသုံးများသော၊ လူသိများသော ဝါးမျိုးများမှာ ကြခတ်ဝါး၊ ထီးရိုးဝါး၊ ဝါးနက်၊ဝါးပိုးဝါး၊ ကြသောင်းဝါး၊ တင်းဝါး၊ သိုက်ဝါး၊ ဝါးဖြူ၊ မြင်ဝါး၊ ရွှေဝါး၊ ဝါးမင်း၊
ဝါးယား၊ ဝါးကောက်တို့ဖြစ်ကြသည်။ ဝါးပင်မှ အစို့ထွက်လာသည့်မျှစ်မှာ မြန်မာတို့အကြိုက် အစားအစာဖြစ် သည်။ မျှစ်ချဉ်အဖြစ်လည်း အချဉ်တည်၍ စားကြသည်။ ဝါးပိုးမျှစ်ချဉ်ကို လူကြိုက်အလွန်များသည်။ ဝါးပင်ပေါက်မျှစ်စို့များသည် အပူဓာတ်ရှိသည်။ အစာအိမ်ကို အစာချေရည်ထွက်စေရန်လှုံ့ဆော်ပေးနိုင်သည်။ အစာစားချင်စိတ်ဖြစ်ပေါ်စေ၍ အစာစားပြီးသောအခါတွင်လည်း အစာကြေစေနိုင်သဖြင့် နာတာရှည် ခံတွင်းပျက်သူ၊နှုတ်မမြိန်ရောဂါရှိသူများမျှစ်ကို ချက်ပြုတ်စားခြင်းဖြင့် ရောဂါသက်သာစေနိုင်သည်။
မျှစ်ကို အနာပေါက်ဆေးကုရာတွင် အသုံးပြုပုံမှာမျှစ်ကို သတ္တုရည်ညှစ်ပြီး အနာပေါ်တွင်လောင်း၍ အဝတ်ဖြင့် တစ်နာရီခန့်ပတ်စည်းထားလျှင် ပိုးတွယ်သောအနာကိုပင် သန့်စင်စေသည်ဟု ရှေးဆေးကျမ်းများတွင်တွေ့ရသည်။ ထိုနည်းတူ ဝါးရွက်တစ်မျိုးမျိုးကိုပြုတ်၍ အနာဖန်ဆေးခြင်းပြုပေးလျှင် အနာအကျက်မြန်စေနိုင် သည်။ အသားနုတက်စေသောဖန်ဆေးဖြစ်သည်။
ဝါးရွက်သည် သွေးဖောက်ပြန်သော ရောဂါ၊ အပူငုပ်နာများကိုနိုင်သည်ဟုဆိုသည်။ ရှေးမြန်မာများသည် မီးဖွားပြီးနောက် သားအိမ်အတွင်းမှ သွေးဟောင်းသွေးပုပ်များ ကင်းစင်စေရန်ဝါးရွက်ဖြင့်ချွေးအောင်း
၊ ချွေးထုတ် ခြင်းကို ပြုလုပ်ပေးကြသည်။
ဆေးကျမ်းများအဆိုအရ ကြခတ်ဝါးရွက်(သို့မဟုတ်) ဝါးရွက်တစ်မျိုးမျိုး လက်တစ်ဆုပ်စာကို ကြိတ်ချေ၍
ပြုတ်ပြီး လက်ဖက်ရည်ပန်းကန်တစ်လုံး ခန့်သောက်ပါက သွေးအန်၊ သွေးကျ ရောဂါ၊ မီးယပ်သွေးချုပ်
ရောဂါပျောက်ကင်းသည်။ ကလေးမွေးပြီးသူများ နို့ရွှင်ဆေးအဖြစ်လည်း တိုက်ကျွေးကြသည်။
ဝါးရွက်သည် ရှာဖွေရလွယ်ကူပြီး အဆိပ်အတောက်လည်းကင်းသော အရွက်ဖြစ်သဖြင့် အဆီတိုးပြီး ဝလာသူများ အနောက်တိုင်းနည်းဖြင့် သွေးစစ်သောအခါ တက်နေသူများ သောက်သုံးသင့်ကြောင်း
ဆေးသုတေသနမှ အတည်ပြုထားသည်။
ကြည်လွင်မြင့်(မုဒြာ)
