ဝေဒနာ ပြင်းထန်လာပြီး ..ဝေဒနာက အချိန်နဲ့အမျှ ရှေ့ကိုသာ တိုးတယ်။
နောက်ကို ပြန်မဆုတ်ဘူး၊
ဒါဆို ကိုယ့်ကိုယ်ကိုယ် သေရမှာ လူတိုင်းသိတယ်။
ပြောရရင်တော့ ..
ဒီတောင် မကျော်နိုင်တော့ဘူး ... ကိုယ့်ကိုယ်ကိုယ် သိတယ်။
အဲ့ဒီတော့ .... သွားမယ် ဆိုရင် စည်း(၃)တန်ကို ကျော်ပြီး သွားရမှာ ....
အဲဒီလို ဝေဒနာ ပြင်းထန်နေချိန်မှာ ရှုမှတ်မှုတရားအရှိန် မရှိဘူးတဲ့ ပုဂ္ဂိုလ်ဟာ .... ငါ သေရတော့မယ် ဆိုတဲ့ အတွေးဝင်ရင် .... ခန္ဓာ့ ဖြစ်စဉ်ကို မသိတဲ့ပုဂ္ဂိုလ် .... တရားနှလုံး မသွင်းဘူးတဲ့ ပုဂ္ဂိုလ် .... သေရတော့မယ် သိရင် ပျော်မလား ?
မပျော်ပါ ဘုရား။
မပျော်ရင် ကြောက်မှာပေါ့၊ ဟုတ်နော်။
ကြောက်ပြီးသေရင် ငရဲသွားမှာ..
နှလုံးမသာယာစိတ် မှန်သမျှ .. စာလို ❝ ဒေါသ ❞ လို့ သုံးတာ .. ဒီ ကြောက်စိတ်နဲ့ဆို ငရဲသွားမှာ။ ဒီစည်း မကျော်နိုင်ဘူး .. ဒါ ပထမစည်းပဲ။
အဲဒီစည်းကို ကျော်နိုင်ဖို့ ကျော်နိုင်တဲ့ စိတ်ဓာတ်အင်အားရှိမှ ကျော်နိုင်မယ်။ ဟုတ်နော် ....
၁။ ရုပ်ဓာတ်တွေ ကတော့ဖြင့် ....
ရုပ်စာ ကျွေးတဲ့အတွက် ကြီးကြီး, ကြီးကြီး လာတယ်။ အခု လမ်းဆုံးနားထိ ရောက်နေကြပြီ။
သို့သော် ....
❝ စိတ်စာ ❞ ကိုတော့ ကျွေးသူ မရှိသလောက်ပဲ၊ စိတ်အားကောင်းဖို့ရာ စိတ်စာသည် ❝ သတိ ❞ ပါပဲ။ ဟုတ်နော်။
❝ စိတ်စာ - သတိ ❞ မကျွေးရင် .... အဲဒီစိတ်သည် ဘယ်တော့မှ မကြီးဘူး။ အခု ခင်ဗျားတို့ စိတ်ကြီး ကြပြီလား ?
မကြီးသေးပါ ဘုရား။
ငယ်ငယ်တုန်းကရော ကိုယ်ကြိုက်တဲ့အာရုံနဲ့ တွေ့ရင် လိုချင်သလား၊ မလိုချင်ဘူးလား ?
လိုချင်ပါတယ် ဘုရား။🙏🙏🙏
အခုကော ... ?
လိုချင်ပါတယ် ဘုရား။🙏🙏🙏
ဒါဖြင့် ... စိတ် မကြီးသေးဘူးပေါ့။
ငယ်ငယ် တုန်းက ကိုယ်မကြိုက်တာနဲ့ တွေ့ရင် မုန်းသလား၊ မမုန်းဘူးလား ?
မုန်းပါတယ် ဘုရား။🙏🙏🙏
အခုကော ... ?
မုန်းပါတယ် ဘုရား။🙏🙏🙏
ဒါဖြင့် ... စိတ် ကြီးပြီလား၊ မကြီး သေးဘူးလား ?
မကြီးသေးပါ ဘုရား။🙏🙏🙏
ဒါဆို ရုပ်ကသာ သေခါနီး နေကြတာ စိတ်က ကလေးပဲ ရှိကြသေးတယ်နော်....။ ဘိုးကလေး၊ ဘွားကလေးတွေပေါ့။
❝ စိတ်စာ - သတိ ❞ မှ မကျွေးကြပဲနဲ့။
❝ စိတ်စာ - သတိ ❞ ကျွေးမှ စိတ်စည်းလုံးမှု ရှိတယ်။
စိတ်စာ ကျွေးမှ စိတ်အေးတယ်။
စိတ်အေးမှလည်း စည်းလုံးမှု ရှိတယ်။ စည်းလုံးမှုရှိမှလဲ စိတ်က ကြီးထွားတယ်။
လောကဓံ ကောင်းတာလဲ မတုန်လှုပ်ဘူး .... လောကဓံ ဆိုးတာလဲ မတုန်လှုပ်ဘူး .... အဲဒါ စိတ်ကြီးသမားမှ ဖြစ်နိုင်တယ်။
အဲဒီ .... စိတ်ကြီးသမားမှသာ ဒီစည်း(၃)ချက်ကို ကျော်နိုင်မယ် နော်။
သတိမရှိတဲ့ ပုဂ္ဂိုလ်တိုင်း ဝေဒနာက ပြင်းထန်နေရင် အဲဒီအခါ စိတ်စည်းလုံးမှု မရှိလို့၊ စိတ် မကြီးထွားတဲ့ ပုဂ္ဂိုလ်ဟာ ❝ ငါ သေရတော့မယ် ❞ ဆိုတဲ့ အတွေး ဝင်ကို ဝင်တယ်။
သေချင်သူ ရှိလား၊ ဘယ်သူမှ မသေချင်ဘူးနော်။
လူ, ဖြစ်ဖြစ်၊ တိရစ္ဆာန်, ဖြစ်ဖြစ် ကိုယ့်ဘဝကို ခင်တွယ်တယ်နော်။
သေရမယ်မှန်း သိရင် ပျော်မလား၊ ကြောက်မလား။
ကြောက်မှာပါ ဘုရား။🙏🙏🙏
ကြောက်ရင်, ကြောက်တာက ... ❝ ဒေါသ ❞ ပေါ့။
ဒါဆို .... ဘယ်သွားမတုန်း။
ငရဲပါ ဘုရား။🙏🙏🙏
ဒီ .... ပထမအတွေး မဝင်ရင်လဲ ဒုတိယအတွေး ဝင်နိုင်တယ်။ ဒုတိယ စည်းပေါ့။ ဟုတ်နော် ....
၂။ သံယောဇဉ် ကြီးလွန်းလို့မှ ....
တစ်သက်လုံး ကျွန်ခံပြီး လုပ်ကျွေးထားတဲ့ သားသမီး၊ ဇနီးတွေ ထားခဲ့ချင်မလား ....
အရိပ်တကြည့်ကြည့်နဲ့ အဲဒါလေးတွေ ကြည့်လေလေ .... သာယာစိတ်ကလေး ရှိလေ၊ နှစ်သက်စိတ်ကလေး ရှိလေ .... တပ်မက်စိတ်ကလေး ရှိလေ၊ အဲဒါ .... အကုသိုလ်တွေလေ၊ ဟုတ်နော်။
အဲ့လောက် .... အစွဲနာထားတာကြီး ရှိနေလျက်နဲ့ ကိုယ့်စိတ်ကလေးကလဲ စည်းလုံးမှု မရှိဘူး ဆိုရင် .... ခင်ဗျားတို့ ဒုတိယစည်းကို ကျော်နိုင်၊ မကျော်နိုင် .... ?
မကျော်နိုင်ပါဘူး ဘုရား။🙏🙏🙏
ဘယ်လို လုပ်ကြမတုန်း ခင်ဗျားတို့....
သတိနဲ့ စိတ်ကို စုစည်းမှု အားကောင်းအောင်၊ ကြီးထွားအောင် ကြိုပြီး လုပ်မထားကြရင် မကျော်နိုင်ဘူးနော်။ ဒုတိယစည်းကို ကျော်နိုင်ဖို့ ခဲယဉ်းတယ်။
စွဲထားကြတာတွေက မွေးကတည်းက စွဲထားကြတာတွေ၊ ဟုတ်နော်။
သားသမီး အပေါ် ... မိသားစု အပေါ် .... ကိုယ့်အိမ်, ကိုယ့်ပစ္စည်း အပေါ် .... ဟုတ်နော်။
အဲဒီလို ငါ့မိသားစု၊ ငါ့ပစ္စည်း တွေနဲ့ မခွဲချင်တဲ့စိတ်လည်း ဝင်မှာပဲ ( သို့မဟုတ် ) အားကိုးစိတ်လည်း ဝင်မှာပဲ။
မခွဲချင်လို့ နှလုံးမသာယာစိတ် ဝင်ရင်လည်း သွားမှာ ငရဲကို။ အားကိုးစိတ် ဝင်ရင်တော့ လာခဲ့ ပြိတ္တာ။ ဒါမှမဟုတ် ငါ့အိမ်၊ ငါ့မိသားစု သာမန်စွဲ ဆိုရင်တော့ တိရစ္ဆာန်။
ဒါဖြင့် .... ဒုတိယစည်း ကျော်ဖို့ တော်တော် ခဲယဉ်းတယ်။
၃။ တတိယစည်း ကလဲ ဝေဒနာ ကျော်ရမှာ။
~~~~~~~~~~~~~~~~~~~~~~~~~~~~~~
သေခါနီးရဲ့ဝေဒနာ၊ မီးစာကုန် ဆီခမ်းနော်။ ခြင်ကိုက်သလို မဟုတ်ဘူးနော် ....
အထဲ, ထဲ ရှိတဲ့ အတိုက်အခံ ဓာတ်ချင်းကို တစ်ဖက်က တစ်ဖက်ကို သေအောင် သတ်မှာနော်။ အတိုက်ဖက်က နိုင်သွားပြီး အခံဖက်က လုံးဝသေမှ ဆုံးမှာ။
အခံဖက်က ခုခံအားကောင်းလို့ အတိုက်ဖက်က အားလျော့သွားရင် မဆုံးသေးဘူး ....
အဲဒီ ကြားမှာ မချိမဆံ့ ခံရမှာ။
အဲလို မချိမဆံ့ ခံရချိန် ဒီ ဝေဒနာကို ဖြစ်၊ ပျက် မမြင်ရင် .... စည်း မကျော်နိုင်ဘူးနော်။
ဒါဖြင့် .... ဒီ တတိယစည်းရော ကျော်နိုင်တဲ့ စိတ်ဓာတ်အင်အား ရှိကြပြီလား .... ?
မရှိသေးပါ ဘုရား။🙏🙏🙏
သေခါနီး အဲဒီလို စည်း(၃)ချက် ကျော်ရမှာဗျ၊၊
အဲဒီ စည်း(၃)ချက်ကို ကျော်နိုင်ပါမှ ကိုယ့်လုပ်စာ ကိုယ် စားရမှာ။
ဉာဉ်ကိုပယ်ပြီး ဉာဏ်နဲ့ သွားနိုင်ပါမှ ကိုယ်လုပ်ထားတဲ့ ဒါန၊ သီလ၊ သမာဓိနဲ့ ပညာ ရှိတဲ့ လူ့ဘုံ၊ နတ်ဘုံ၊ အထက်ဘုံနဲ့ နိဗ္ဗာန် ကို ရောက်တာ၊ ဟုတ်နော်။
သေခါနီး ကြည့်လိုက် ....
ဂတိနိမိတ်ကောင်းလို့ လူနိမိတ်၊ နတ်နိမိတ် ရောက်တဲ့ ပုဂ္ဂိုလ်ကို ကြည့်ရင် အိပ်ပျော်နေသလို ပြုံးပြုံးလေး ....
သေခါနီး သားသမီးတို့၊ အိမ်တို့ .... အဲဒါတွေ အစွဲနဲ့ သေမယ်ဆိုရင် ပြိတ္တာနဲ့ တိရစ္ဆာန် ဖြစ်မယ့်ပုဂ္ဂိုလ်ရဲ့မျက်နှာကျတော့ ညှိုး, ညှိုးလေး။
သေခါနီး မကောင်းမှုတွေ လုပ်ထားလို့ ငရဲနိမိတ် မြင်တဲ့ ပုဂ္ဂိုလ်ရဲ့ မျက်နှာကျတော့ မဲ့မဲ့ကြီး။
ကိုင်း .... နေဝင်ခါ နီးပြီဗျ။
အိမ်အပြန် မျက်နှာပန်း လှကြပါ့မလား ?
စည်း(၃)ချက်ကို ကျော်နိုင် ကြပါ့မလား ?
❝ #အချိန်က_မရပ်မနား_သွားနေသလို_အရွယ်ကလည်း_မနားဘူးနော်။ ❞
ဒါကြောင့် ခင်ဗျားတို့ နားနေလို့ မရဘူး။
❝ #ပြုံးပြုံးလေး_သေချင်ကြရင်_ခုကတည်းက_စိတ်ကို_သတိ_အစာ_မပြတ်ကျွေးပြီး #လက်ကျန်အချိန်လေး_ရှိတုန်း_ဆောင်ရွက်သင့်သည်များကို_ကြိုတင်_လုပ်ဆောင်ထားကြပါ။ ❞
🙏 မဟာဗောဓိမြိုင်ဆရာတော်ဘုရားကြီး🙏
