အမျှင်ဓာတ် ဆိုတဲ့ Fiber ဓာတ်က နောက်ပိုင်းမှာ ခေတ်စားလာတဲ့ ဝေါဟာရ တခုပေါ့။ အစားအသောက်တွေမှာ အမျှင်ဓာတ် ပါသင့်တယ် ဆိုပြီး ဘယ်အရာတွေက အမျှင်ဓာတ် များတယ်၊ ဘာတွေ စားသင့်တယ် ဆိုတာကို ညွှန်းလာကြ ပါတယ်။ ဘာကြောင့်လဲ ဆိုတော့ အမျှင်ဓာတ်တွေက ကိုလက်စထရော ဆိုတဲ့ အဆီဓာတ်ကို လျှော့ချ ပေးတယ်၊ ဝမ်းမချုပ်အောင် ကာကွယ်တယ်၊ အစာကြေလွယ်စေတယ် ဆိုတဲ့ အကျိုးကျေးဇူးတွေ ရှိလို့ ပါပဲ။ နာတာရှည် ကင်ဆာလို ဝေဒနာမျိုးတွေပါ ကာကွယ်ပေးတယ် လို့တောင် ဆိုကြပါတယ်။ အဲဒီ အပြောများ လာတဲ့ အမျှင်ဓာတ်ကို ဘယ်လို အစားအသောက်တွေကနေ ရနိုင်မလဲဆိုတာ သိထားရင်ဖြင့် စီစဉ် စားသောက်နိုင်ကြမှာ ပါ။
နံနက်စောစောစာကို အမျှင်ဓာတ်နဲ့ စတင်ပါ
အများစုက အမျှင်ဓာတ် မပါဘဲ စားသောက် နေကြတာတွေ ရှိပါတယ်။ နေ့စဉ် လိုအပ်ချက်ရဲ့ ထက်ဝက်လောက်သာ စားသုံးဖြစ်ကြတာ များတယ် လို့ ဆိုပါတယ်။ ဂျုံကြမ်း၊ ဆန်ကြမ်းတွေက အမျှင်ဓာတ် ကြွယ်ဝတာတွေမို့ အိပ်ယာထ နံနက်စောစောစာ ကတည်းက အမျှင်ဓာတ်နဲ့ စတင်သင့်ပါတယ်။ ဂျုံကြမ်း၊ ဆန်ကြမ်းတွေက လုပ်တဲ့ ဆီရီယယ် Cereal တွေ၊ ကွေကာအုပ်လို အစားအသောက်တွေ စားပေးသင့်ပါတယ်။ သစ်သီးလေးပါ ထည့်ပြီး နံနက်စာ မှာစားတာက အမျှင်ဓာတ် အတွက် ပိုကောင်းပါ သတဲ့။
လတ်ဆတ်တဲ့ သစ်သီးဝလံတွေ
ဘယ်လို လတ်ဆတ်တဲ့ သစ်သီးဝလံမျိုး မဆို ကျန်းမာရေး အတွက် ကောင်းမွန်ပါတယ်။ ဒါပေမယ့် အမျှင်ဓာတ် ပါဝင်မှု ကျတော့ တမျိုးနဲ့ တမျိုး မတူကြပါဘူး။ ငှက်ပျောသီး၊ ရပ်စ်ဘယ်ရီ၊ ဘလူးဘယ်ရီသီး တွေမှာက အမျှင်ဓာတ် ပါဝင်မှု ကြွယ်ဝတယ် လို့ ဆိုကြပါတယ်။ ပန်းသီးတွေကိုလည်း အခွံပါစားရင် အမျှင်ဓာတ် အများကြီး ရပါသတဲ့။
ဂျုံကြမ်းပေါင်မုန့်နဲ့ ဘီစကစ်တွေ
ပေါင်မုန့်ညိုတွေ အခုဆို ဆိုင်အတော်များများမှာ တွေ့နေရပါပြီ။ Whole-grain bread ဆိုပြီးပေါ့။ အဲဒီလိုပဲ Whole-grain cracker ဆိုပြီး သရေစာတွေလည်း ရနိုင်နေပါပြီ။ ဆန်ကြမ်း၊ ဂျုံကြမ်းက လုပ်တဲ့ ဒီမုန့်တွေမှာ ဖွဲနု၊ ဖွဲကြမ်းဓာတ် တွေလည်း ပါဝင်နေတာပေါ့။ အဲဒီလို အမျှင်ဓာတ်များတဲ့ အစားအသောက်တွေ စားတာက နှလုံးရောဂါနဲ့ ဆီးချိုရောဂါ တွေ ကာကွယ်ပေး ပါတယ်။
ဟင်းသီးဟင်းရွက်
ပဲသီးတွေ၊ ဟင်းနုနွယ်၊ ပန်းဂေါ်ဖီစိမ်းနဲ့ အာလူးတွေ မှာလည်း အမျှင်ဓာတ် အများကြီး ပါဝင်ပါတယ်။ တချို့ ဟင်းသီး ဟင်းရွက်တွေ ကျတော့လည်း ပါဝင်မှု နည်းပါ သတဲ့။ အမျှင်ဓာတ်များများ ရချင်ရင် ကြက်ဥမွှေကြော်၊ အသားညှပ်မုန့်၊ ခေါက်ဆွဲ၊ ပီဇာနဲ့ စွပ်ပြုတ်တွေမှာ ဟင်းသီးဟင်းရွက်တွေ အများကြီး ထည့်သွင်း စားသောက်နိုင်ပါတယ်။
အသီးခြောက်တွေ
ဆီးသီး ဆိုရင် အစာကြေညက်မှု အတွက် ကောင်းမွန်တယ် လို့ သိကြပါတယ်။ ဒါဟာလည်း အမျှင်ဓာတ် ကြွယ်ဝလို့ပါ။ သစ်သီးခြောက် အများစုက အမျှင်ဓာတ်ကြွယ်ဝပြီး အူတွေ လှုပ်ရှားမှုကို ထိန်းသိမ်းပေးတာကြောင့် ဝမ်းမချုပ်စေဘူးလို့ ဆိုပါတယ်။ ဘယ် အသီးအခြောက်မျိုး မဆို (စပျစ်၊ ဆီးသီး စသဖြင့်) လက်တဆုပ်စာလောက် နေ့စဉ် စားပေးသင့် ပါတယ်။ ဒီအတိုင်း ဖြစ်စေ၊ ပါးပါးလှီးပြီး တခြားသွားရေစာ တွေနဲ့ ရောနှောပြီး ဖြစ်စေ စားတာက အမျှင်ဓာတ်တွေ ရရှိစေမှာ ပါ။
ပဲအမျိုးမျိုး
ပဲစေ့တွေ ကလည်း အမျှင်ဓာတ် ကြွယ်ဝတဲ့ အပြင် ပရိုတင်း အသားဓာတ်တွေ ကြွယ်ဝပြီး အဆီနည်းနည်းသာ ပါဝင်ကြတာပါ။ အသားအစား ပဲကို တပတ် ၂ ခါလောက် စားပေးတာက အမျှင်ဓာတ်ရပြီး ဝမ်းအတွက်လည်း ကောင်းစေပါတယ်။ ပြုတ်၊ ပေါင်း၊ သုပ် အမယ်စုံ လုပ်စားနိုင်တာပေါ့။ ပဲသီးတွေ ကလည်း အဲဒီအတိုင်း အမျှင်၊ ပရိုတင်း ကြွယ်ဝပြီး အဆီနည်းတဲ့ အစားအသောက်တွေ ပါပဲ။ ပဲတောင့်ရှည်၊ ပဲစောင်းလျား စသဖြင့် ပဲသီးစုံပေါ့။ ဒါပေမယ့် အဆမတန် စားရင်တော့ လေပွတတ်တာ သတိထားရမှာပါ။
အစေ့အဆံ
အစေ့အဆံတွေမှာက ကယ်လိုရီများ တယ်၊ အဆီတွေ ပါတယ်လို့ ယူဆကြတာ များပါတယ်။ အာဟာရဓာတ်နဲ့ အမျှင်တွေ ကြွယ်ဝတာကို မေ့ထား တတ်ကြပါတယ်။ ဗာဒံစေ့၊ သီဟိုဠ်စေ့နဲ့ မြေပဲတွေက အသင့်အတင့်တော့ စားသုံးသင့်တဲ့ အမျှင်ဓာတ် ကြွယ်ဝတဲ့ အစားအသောက်တွေ ပါပဲ။
အမျှင်ဓာတ် ပါဝင်အောင် အသင့်ပြင်ဆင်ထားတဲ့ အစားအသောက်တွေ
တခြား အသီးအနှံ၊ ဟင်းသီးဟင်းရွက်၊ ပဲ၊ အစေ့အဆံနဲ့ ဆန်၊ ဂျုံ အကြမ်းတွေ အမြဲတမ်း ကိုယ့် အစားအသောက်မှာ အမျှင်ဓာတ် အသင့် ထည့်ထားတာတွေ စားနိုင်ပါတယ်။ Cereal၊ ဒိန်ချဉ်၊ အီတလီခေါက်ဆွဲ စတဲ့ အစားအသောက် တွေမှာ အမျှင်ဓာတ် ထည့်သွင်းပြီး ပမာဏ ဘယ်လောက်ဆိုတာ ထုပ်ပိုး ရေးထိုးထားတတ် ပါတယ်။ အဲဒါတွေလည်း ဖြည့်စွက် စားသုံးလို့ ရပါတယ်။
ဒီလိုဆိုတော့လည်း အသက်ရှင်သန် နေထိုင်မှုမှာ အာဟာရ မှီဝဲတဲ့အခါ အမျှင်ဓာတ်က အရေးပါသလို၊ အမျှင်ဓာတ် ကြွယ်ဝတဲ့ အစားအစာတွေ ကိုလည်း သိရပြီပေါ့။ ရှင်ခန်းမှာ ရွှင်လန်းဖို့ အမျှင်တန်းလေးတွေ သုံးဆောင်ကြပါစို့။ ။
